Þykjó

Þverfaglegt hönnunarteymi

ÞYKJÓ er þverfaglegt hönnunarverkefni fyrir börn og fjölskyldur þeirra á sviði textíl-, leikfanga- og upplifunarhönnunar.

Hönnunarstarf ÞYKJÓ miðar að því að örva ímyndunarafl og sköpunarkraft barna í frjálsum leik. Í hönnunarvinnu höfum við til hliðsjónar hvernig hægt er að örva snertiskyn með efnisvali og formfræði, hreyfiþroska og jafnvægisskyn.

ÞYKJÓ stendur einnig fyrir fjölbreyttum listsmiðjum, innsetningum og viðburðum í samstarfi við söfn og menningarstofnanir.

ÞYKJÓ er hópur hönnuða með fjölbreyttan bakgrunn sem samnýta ólíka sérþekkingu í teymisvinnu sinni. Innan vébanda ÞYKJÓ eru arkitekt, fatahönnuður og klæðskeri, leikmynda- og búningahönnuður.

Hópurinn vinnur einnig náið með listafólki, vísindamönnum og fræðifólki á borð við uppeldisfræðinga, líffræðinga, listfræðinga og síðast en ekki síst - með börnum.

Í vöruþróunar- og framleiðsluferli sínu, leggja hönnuðirnir upp úr að nýta innlenda fagþekkingu og tækjabúnað úr fjölbreyttum iðngreinum; allt frá fléttun tága, til neta- og burstagerðar. Allt þetta miðar að því að halda staðbundinni framleiðslu, nýta hráefni sem fellur til og viðhalda verkþekkingu.

Teymið

Sigríður Sunna Reynisdóttir

Búninga og leikmyndahönnuður

Er stofnandi og listrænn stjórnandi ÞYKJÓ. Hún er með fjölbreyttan bakgrunn í hönnun, dagskrárgerð og verkefnastjórnun. Sigríður Sunna útskrifaðist vorið 2012 frá Royal Central School of Speech and Drama í London af sviðshöfunda og brúðleikhúsbraut (BA Theatre Practice), en áður hafði hún lokið prófi í Almennri bókmenntafræði frá Háskóla Íslands og Universitá Karlová í Prag. Síðustu ár hefur hún hannað leikmyndir, búninga og leikbrúður fyrir fjölda sviðsverka í Borgarleikhúsinu, Þjóðleikhúsinu og í Tjarnarbíó, en einnig fyrir Leikfélag Akureyrar og Íslenska dansflokkinn.

Ninna Þórarinsdóttir

Barnamenningarhönnuður

Er barnamenningarhönnuður sem sérhæfir sig í myndskreytingum og leikfangahönnun. Ninna útskrifaðist með BA Honors í hönnun frá Design Academy Eindhoven í Hollandi árið 2006 og svo árið 2015 með MA í barnamenningarhönnun frá HDK í Gautaborg, Svíþjóð. Hún starfar sjálfstætt sem teiknari, grafískur hönnuður og myndlistakennari. Ninna vinnur allar teikningar ÞYKJÓ og hefur yfirumsjón með listasmiðjum okkar. Ninna heldur utan um vöruþróun hreiðra og tóneggja í verkefninu Fuglasöngvar sem verður kynnt með innsetningu í Salnum Tónlistarhúsi á HönnunarMars.

Erla Ólafsdóttir

Arkitekt

Er arkitekt. Hún lauk MA námi í arkitektúr frá Det Kongelige Danske Kunstakademis Skoler for Arkitektur, Design og Konservering í Kaupmannahöfn árið 2016. Erla hefur síðan starfað sjálfstætt auk þess að vinna fyrir studiohring, dap arkitekta og fleiri teiknistofur. Hún vinnur allar þrívíddar- og verkteikningar fyrir innsetningar okkar og heldur utan um hönnun og teikningar að Kyrrðarrýmum ÞYKJÓ sem verða kynnt í Gerðarsafni á HönnunarMars.

Sigurbjörg Stefánsdóttir

Klæðskeri og fatahönnuður

Er fatahönnuður og klæðskeri. Sigurbjörg nam fatahönnun og sníðagerð við London Collage of Fashion, en áður hafði hún lokið sveinsprófi í Kjólasaum frá Tækniskólanum í Reykjavík. Hún hefur m.a. starfað við búningagerð fyrir Royal Opera House í London, Íslensku Óperuna og Þjóðleikhúsið. Sigurbjörg heldur utan um hönnun og sníðagerð fyrir búningalínuna ,,Ofurhetjur jarðar” sem er nú í þróun hjá ÞYKJÓ og verður kynnt með innsetningu í Bókasafni Kópavogs á HönnunarMars.